त्रिभुवन विश्वविद्यालयको उपकुलपति छनोटका लागि आज बिहान भएको विज्ञापनको चौतर्फि विरोध भएपछि प्रधानमन्त्री एवं त्रिभुवन विश्वविद्यालयका कुलपति पुष्पकमल दाहाल ‘प्रचण्ड’ले सर्च कमिटिको बैठक बोलाएका छन् ।
विश्वविद्यालयका कुलपति समेत रहेका प्रधानमन्त्री पुष्पकमल दाहाल प्रचण्डले सदस्यलाई आज दिउसो छलफलमा बोलाएका हुन् । विज्ञापनको बुँदा नम्बर ङको प्रावधान हेरफेरका लागि सदस्यलाई बोलाइएको प्रधानमन्त्रीको सचिवालयले जनाएको छ ।
प्रधानमन्त्रीका स्वकीय सचिव रमेश मल्लका अनुसार सर्च कमिटिले राखेको मापदण्ड परिवर्तन गर्नु पर्ने भएकाले प्रधानमन्त्रीले सदस्यलाई बोलाएका हुन् ।
सर्च कमिटिको दरखास्त सार्वजनिक भए लगत्तै यो प्रावधानले त्रिवि पूर्व पदाधिकारीको क्लब बन्ने, सिधै कार्यकर्तालाई नियुक्ति दिन मिल्ने चर्को स्वर सामाजिक सञ्जालमा आएको थियो ।
त्रिवि सुधार आन्दोलनमा लागेकाले पनि मापदण्ड परिवर्तन नगरे कडा आन्दोलन गर्ने चेतावनी दिएका थिए ।
आज जारी सूचनाअनुसार उम्मेदवार नेपाली नागरिक हुनुपर्ने छ । नागरिकताको प्रमाणपत्रको प्रतिलिपि, वैयक्तित विवरण, स्नातकोत्तर र विद्यावारिधि तहको शैक्षिक योग्यताका प्रमाणपत्रको प्रतिलिपि, प्राध्यापकको सुरु नियुक्तिपत्रका प्रमाणित प्रतिलिपि, विश्वविद्यालयको पदाधिकारीमध्ये कुनै एक पदमा कम्तीमा तीन वर्ष काम गरेको व्यहोरा खुलेको विवरण तथा प्रमाणित प्रतिलिपि बुझाउनुपर्ने भनिएको छ ।
सूचनामा बढीमा तीन हजार शब्द रहेको विश्वविद्यालयसम्बन्धी सोचपत्र र बढीमा पाँच शब्द रहेको चार वर्षे व्यावसायिक कार्ययोजना पनि बुझाउन भनिएको छ ।
