शिक्षक सेवा आयोगले प्राथमिक तह तृतीय श्रेणी, शिक्षक पदको प्रतियोगितात्मक लिखित परीक्षाको तीन जिल्लाको नतिजा सार्वजनिक गरेको छ ।
आयोगले अहिले सार्वजनिक गरेको नतिजा अनुसार तीनै जिल्लामा माग संख्या अनुसारका उम्मेदवार भने उत्तीर्ण हुन सकेनन् ।
आयोगले तेह्रथुम, ताप्लेजुङ र झापा जिल्लाको लिखित परीक्षाको नतिजा प्रकाशन गर्दा उम्मेदवार भने माग संख्या अनुसार अन्तर्वार्ताका लागि सिफारिस हुन नसकेका हुन् ।
आयोगले अहिले सार्वजनिक गरेको नतिजा अनुसार तेह्रथुममा समावेशी तर्फको दरबन्दी माग संख्या ५६ र खुला तर्फ १३ गरी जम्मा ६९ रिक्त दरबन्दीमा शिक्षक छनोटका लागि लिएको विषयगत लिखित परीक्षामा ३७ जना मात्र अन्तर्वार्ताका लागि सिफारिसमा पर्न सफल भएका छन् । सो परीक्षाका लागि सामान्य परीक्षाबाट उत्तीर्ण भएका ५६ जना उम्मेदवार सम्मिलित भएका थिए ।
त्यसैगरी आयोगले केही समय अघि सार्वजनिक गरेको नतिजा अनुसार ताप्लेजुङमा खुला तर्फ ३३ र समावेशी कोटातर्फ ८७ रिक्त दरबन्दीका लागि लिइएको परीक्षामा ७९ जना मात्र उत्तीर्ण भएका छन् । सो परीक्षामा १०५ जना उम्मेदवार सहभागी भएका थिए ।
त्यस्तै अहिले सार्वजनिक भएको झापा जिल्लाको नतिजा अनुसार खुला तर्फ ३८ र समावेशी कोटा तर्फका३७ गरी ७५ रिक्त दरबन्दीमा शिक्षक नियुक्तिका लागि लिइएको प्रतियोगितात्मक परीक्षाबाट अन्तर्वार्ताका लागि १०९ जना सिफरिस भएका छन् ।
