प्राविधिक शिक्षा तथा व्यावसायिक तालीम परिषद (सीटीईभीटी) गत असार २९ गते सार्वजनिक शुल्क वृद्धिको पुनरावलोकन गर्न तीन सदस्यीय समिति गठन गरेको छ । सीटीईभीटीले निर्देशक रामहरि देवकोटाको संयोजकत्वमा ३ सदस्यीय समिति गठन गरिएको हो ।
सीटीईभीटीले प्रमाण पत्र तह सामान्य चिकित्सा, डिप्लोमा इन फार्मेसी र प्रमाण पत्र तह नर्सिङको २०७९ पुस ६ गतेको मन्त्री स्तरीय निर्णय, विभिन्न समयमा गठित शुल्क समायोजन सम्बन्धी कार्यटोलीका सुझाव एवं परिषद् कार्यालयको असार १ गतेको निर्णयले शुल्क समायोजन गरेको २९ गते सूचना सार्वजनिक गरी जानकारी दिएको थियो ।
फार्मेसीमा २५ प्रतिशत बृद्धि गरी ३ लाख ८ हजार ६६०, सामान्य चिकित्सामा ३० प्रतिशतले शुल्क वृद्धि गरी ५ लाख २३ हजार ८२० र नर्सिङमा ३१ प्रतिशतले शुल्क वृद्धि गरी ६ लाख २४ हजार २३० रुपियाँ निर्धारण गरेको छ ।
विद्यार्थी संगठन, डा. गोविन्द केसीलगायतका सरोकारवालको चौतर्फी विरोध र शिक्षा मन्त्रीको निर्देशन पछि चिकित्सा शिक्षाको नियमन निकाय चिकित्सा शिक्षा आयोगले स्नातक तहको बिएन मा ५ लाख १८ हजार शुल्क हुनु तर प्रमाणपत्र तहमा सो भन्दा १ लाख ६ हजार बढीले शुल्क वृद्धि हुने गरी गरिएको निर्णय प्रति आपत्ति जनाएको छ । सीटीईभीटीको शुल्क वृद्धिको निर्णय व्यवहारिक नभएको हुँदा पुनरावलोकन हुनुपर्ने आयोगका उपाध्यक्ष प्राडा श्रीकृष्ण गिरी बताउँछन् ।
