अख्तियार दुरुपयोग अनुसन्धान आयोगले तनहँ जिल्ला, भानु नगरपालिका कार्यक्षेत्र भई राष्ट्रिय पुनर्निर्माण प्राधिकरण जिल्ला आयोजना कार्यान्वयन इकाई (शिक्षा) अन्तर्गत कार्यरत एक कर्मचारीलाई घुस रकम सहित पक्राउ गरेको छ ।
आयोगको कार्यालय पोखराबाट खटिई गएको टोलीले सव–इन्जिनियर सुरेन्द्र अधिकारीलाई पक्राउ गरेको हो । आफ्नो कार्यक्षेत्र भित्रको विद्यालयको भौतिक संरचना निर्माणमा निकासा दिलाइदिए वापत लिए १ लाख ५०हजार रुपियाँ सहित पक्राउ गरेको अयोगका सहायक प्रवक्ता वेदप्रसाद भण्डारीले जानकारी दिए ।
भण्डारीका अनुसार सव–इन्जिनियर अधिकारीले घुस लिएको पुष्टि हुन आएको हुँदा निजले गरेको उक्त कार्य भ्रष्टाचार निवारण ऐन, २०५९ को दफा ३ को उपदफा (१) अनुसारको कसुर भएकोले निजलाई बिगो रु. १ लाख ५० हजार रुपियाँ कायम गरी भ्रष्टाचार निवारण ऐन, २०५९ को दफा ३ को उपदफा (१) र दफा ३ को उपदफा (१) को खण्ड (घ) बमोजिम सजाय हुन मागदाबी लिई विशेष अदालत, काठमाडौंमा आरोपपत्र दायर गरिएको छ।
