हिन्दु परम्पराअनुसार आज सरस्वती पूजा श्रीपञ्चमी । लगभग सबै बालबालिकाले आज विहानै सबै विद्याकी देवी सरस्वतीको पूजा अर्चना गरेर दिनको सुरुवात गरे । शिशिर ऋतुका दुई महिना माघ र फागुनमा पर्ने भएकाले यसलाई र्श्रीपञ्चमी भनिँदै आएको छ । यसका अलावा आज ससाना बालबालिकालाई अक्षराम्भ गराइँदै आएको छ ।
निजी वा सामुदायिक विद्यालयले आज विद्यालयमा भर्ना हुन आएका विद्यालय भर्ना उमेर समूहका सबै बालबालिकालाई निःशुल्क भर्ना गर्दै आएका छन् । विद्यालयले अभिभावकलाई पत्राचार गरेर वा सूचना टाँस गरी आजबाट अक्षराम्भ गर्ने बालबालिकालाई नर्सरीमा निःशुल्क भर्ना लिँदै आएका छन् ।
हाम्रो परम्परागत मान्यता अनुरुप आज जुनसुकै कार्यको सुरुवातका लागि अत्यन्तै राम्रो हुने भएकाले आज भर्ना हुन आएका विद्यार्थीलाई निशुल्क लिइने गरेको मेरी गोल्ड इङ्लिस स्कुलका प्रिन्सिपल भूवन श्रेष्ठले बताए । आफ्नो विद्यालयको प्ले ग्रुपमा आज करिब २० जना बालबालिका भर्ना हुन आएको उनले जानकारी दिए ।
विद्यालयहरुमा आज विशेष पूजा–आजाका साथ अक्षराम्भ गारउने गरिएको छ । हरेक विद्यालयले आफ्नै परिसरमा र विभिन्न स्थानमा रहेका सरस्वतीका मन्दिरमा आज विशेष पूजा अर्चना गर्ने गरिएको छ ।
