२०८० सालको एसइईमा जतिसुकै विषयमा ननग्रेडेड प्राप्त गरेको भए पनि एक पटकका लागि मौका परीक्षामा सबै विद्यार्थीलाई सम्मिलित हुन दिने शिक्षामन्त्रीस्तरीय निर्णय भएको छ ।
त्यसका लागि लेटर ग्रेडिङ निर्देशिका संशोधन गर्न पाठ्यक्रम विकास केन्द्रलाई आजै परिपत्र गरिएको छ ।
शिक्षा, विज्ञान तथा प्रविधि मन्त्रालयका प्रवक्ता केशव दाहालले एक पटकका लागि मात्र जतिसुकै विषयमा एनजी आए पनि मौका परीक्षामा सम्मिलित हुन दिने व्यवस्था गर्न लागिएको जानकारी दिए ।
हालको व्यवस्थाअनुसार बढीमा दुई विषयसम्म एनजी भएकाले मौका परीक्षामा सम्मिलित हुन पाइनेछ । आगामी साउन १८ र १९ गते मौका परीक्षा तोकिएको थियो । बिहीबार सार्वजनिक भएको २०८० सालको एसइईको नतिजाअनुसार एक लाख १५ हजार ८३४ परीक्षार्थीले मौका परीक्षामा सम्मिलित हुन पाउने थिए ।
यसैगरी मन्त्री सुमना श्रेष्ठले राष्ट्रिय परीक्षा बोर्डलाई एनजी उल्लेख भएका सबै विद्यार्थीलाई मौका परीक्षाको व्यवस्था गरिदिन निर्देशन दिएकी छिन् । त्यसका लागि पनि आजै बोर्डमा पत्राचार गरिएको छ । लेटर ग्रेडिङ निर्देशिकाअनुसार एनजी प्राप्त गरेका विद्यार्थीले तीन पटकसम्म परीक्षामा सम्मिलित हुन पाउने व्यवस्था छ । मौका परीक्षामा पनि एनजी प्राप्त गरेका विद्यार्थीले आगामी वर्ष जेजति विषयमा एनजी प्राप्त गरेको हो सोही विषयमात्र दिए पुग्छ ।
मन्त्रालयले शिक्षण सिकाइका लागि आवश्यक प्रबन्ध गर्न पनि शिक्षा तथा मानव स्रोत विकास केन्द्रलाई निर्देशन दिएको छ ।
