त्रिभुवन विश्वविद्यालय मातहतमा एक वर्ष आफ्नो कार्यकाल पुरा गरेका आंशिक प्राध्यापकलाई करार गर्नुपर्ने, समान कामको समान ज्याला लगायतको माग राखि आंशिक प्राध्यापकहरु आन्दोलमा उत्रिएका छन् । कोरोना संक्रमणपछि आफूहरुले निरन्तर काम गरेपनि पारिश्रमिक नपाएको समान कामको पारिश्रमिक फरक भएको भन्दै आंशिक प्राध्यापकहरु उपकुलपति कार्यालय परिसरमा दुईदिन देखि धर्नामा बसेका छन् ।
त्रिविको करिब ८० प्रतिशत कक्षा आंशिक प्राध्यापकले लिँदै आएका छन् । देशभर करिब १८ सय आंशिक प्राध्यापक कार्यरत रहेको आंशिक प्राध्यापक संघले जानकारी दियो । त्रिविले आंशिक शिक्षकको आँखामा छारो हाल्ने गरेको । उपेक्षा गरेकै कारण बाध्य भएर आन्दोलनमा उत्रिएको प्राध्यापकहरु बताउँछन् । ‘एउटै कक्षा पढाउने अन्य प्राध्यापकले मासिक ४३ हजार सम्म बुझ्दा आफूहरुले ८ हजारमा चित्त बुझाउनु परेको छ ।’संघका उपाध्यक्ष युवराज लामिछानेले भने, ‘ समान कामको समान ज्याला मुख्य माग हो, त्रिविले पटक पटक आश्वासन दिएपनि माग सम्बोधन गर्न तत्पर देखिएन ।’
त्रिविमा २०७४ मंसिरदेखि आंशिक प्राध्यापक नियुक्त गर्न थालिएको हो । त्रिवि कार्यकारी परिषद्ले २०७४ वैशाखमै दरबन्दी थप्ने निर्णय गरेपनि अहिलेसम्म सो निर्णय कार्यान्वयन हुन सकेको छैन । सरकार र विश्वविद्यालयसँग भएको सहमति अनुसार आंशिक प्राध्यापकलाई करारमा नियुक्ति गर्न १ हजार ४ सय २० दरबन्दी थप गर्ने निर्णय भए पनि सरकारले दरबन्दी थपका लागि स्विकृति नदिँदा विश्वविद्यालयले आंशिक प्राध्यापकलाई करारमा नियुक्ति दिन नसकेको पदाधिकारीहरु बताउँछन् ।
