बझाङको साइपाल गाउँपालिका–४ मा रहेको धुली माध्यमिक विद्यालयका शिक्षक विद्यार्थी एकाएक बिरामी पर्न थालेपछि केही दिनका लागि विद्यालय बन्द गरिएको छ । करिब एक हप्तादेखि कोरोनाको जस्तै लक्षण देखिन थालेपछि विद्यालय बन्द गरिएको हो ।
बिरामी विद्यार्थी र शिक्षकमा खोकी लाग्ने, ज्वरो आउने, घाँटी दुख्ने, वाकवाकी लाग्ने र घोरिरहने जस्ता लक्षण देखिएको धुली माविका सहायक प्रधानाध्यापक धनबहादुर विष्टले बताए । विद्यालयका कक्षा ६ देखि ९ सम्म अध्ययनरत विद्यार्थी र केही शिक्षकमा यस्ता लक्षण देखिएका हो ।
एक हप्तासम्म औषधोपचार गर्दा पनि बिरामी विद्यार्थी र शिक्षकलाई ठिक नभएपछि बुधबार बसेको विद्यालय व्यवस्थापन समितिको बैठकले विद्यालय बन्द गरेको हो ।
सो विद्यालयमा दुई सय ४५ विद्यार्थी र ११ शिक्षक रहेका छन् । विद्यालयले नजिकै रहेको धुली सामुदायिक स्वास्थ्य केन्द्रबाट प्राथमिक उपचार गराए पनि बिरामीमा कुनै परिवर्तन नआएको विद्यालयले जानकारी दियो।
साथै केही दिन अगाडि मात्र धलौनमा रहेको धलौन माविका विद्यार्थी र शिक्षकमा पनि यस्तो लक्षण देखा परेको थियो । सो विद्यालयका अन्य शिक्षक र विद्यार्थीलाई उक्त लक्षण सरेकाले चार दिनसम्म बन्द गरिएको थियो । उपचार गरी ठिक भएपछि अहिले विद्यालय सञ्चालनमा आएको स्थानीय वसन्त बोहोराले बताए ।
