मध्यपुरथिमि नगरपालिकामा मूल थलो भई उपत्यकाका विभिन्न क्षेत्रमा बसोबास गर्दै आएको नेवार समुदायको संस्था शान्ति खलःले चालीस विद्यार्थी तथा ज्येष्ठ नागरिकलाई सम्मान गरेको छ ।
थिमिका बासिन्दाको हकहितका लागि विसं २०३६ मा स्थापना भएको खलःले विसं २०७५ को एसइई परीक्षा उत्र्तीण गरेका विद्यार्थी तथा ज्येष्ठ नागरिकलाई सम्मान गरेको हो । सम्मान हुनेमा ३० विद्यार्थी, आठ ज्येष्ठ नागरिक र दुई संरक्षक सदस्य रहनुभएको छ । खलःको सरक्षक सदस्य हुनलाई रु एक लाख एक खलःलाई बुझाउनुपर्ने हुन्छ ।
यस वर्ष सुन्दरमान श्रेष्ठ ‘बागमती भाइ’ र रमेशकाजी श्रेष्ठ संरक्षक सदस्य बन्नुभएको छ । यसअघि बालगोपालदास श्रेष्ठ, रमेशकुमार चाङ्गु भडेँल संरक्षक सदस्य बन्नुभएको थियो । विद्यार्थी र ज्येष्ठ नागरिकलाई प्रदेशसभा सदस्य डा राजेन्द्रमान श्रेष्ठले खादा, मेडल, प्रमाणपत्र र मायाको चिनो प्रदान गर्नुभयो ।
सांसद श्रेष्ठले नेवार समुदायको हक, हितका लागि शान्ति खलःले महत्वपूर्ण काम गरेको बताउनुभयो । “बेरोजगार व्यक्तिलाई आयमूलक तालीम प्रदान गर्न खलःले सहयोग पु¥याएको छ”, उहाँले भन्नुभयो ।
विसं २०३६ मा स्थापना भएको खलःमा हाल ४०० साधारण सदस्य, ४०० आजीवन सदस्य रहेको खलःका उपाध्यक्ष ईश्वरलाल श्रेष्ठले जानकारी दिनुभयो ।
